अछाम । अछामको पञ्चदेवल विनायक नगरपालिका–४ स्थित कालिकास्थानमा मृत भेटिएका १७ वर्षीय किशोरको शव उठाउन स्थानीय सहमत भएका छन् । जेठ २१ मा मृत फेला परेका कक्षा १० मा अध्ययनरत बिनोद शाहीको शव स्थानीयसँगको सहमतिपछि घटनास्थलबाट अस्पतालमा लगिएको छ ।
शव पोष्टमार्टमका लागि अस्पतालमा लगिएको जिल्ला प्रहरी कार्यालय अछामका एकजना अधिकृतले बताए । घटना अनुसन्धानमा परिचालित केन्द्रिय अनुसन्धान ब्यूरोको टोलीले शंकास्पद ५ जनालाई पक्राउ गरेको छ । किशोरको मृत्युबारे अनुसन्धान गर्न केन्द्रिय अनुसन्धान ब्यूरोका डिएसपी मनोहर भट्ट नेतृत्वको टोली घटनास्थलमा छ । बिनोद पञ्चदेवल विनायक नगरपालिका–४ स्थित कालिकास्थान स्थित मध्यपहाडी लोकमार्गबाट १ किमी तल जंगलमा उनी मृत फेला परेका हुन् ।
जेठ २१ मा आक्रोशित समुहले ईलाका प्रहरी कार्यालय विनायकमा तोडफोड गरेका थिए । स्थानीयले प्रहरीको ना.१ झ १२८६ नम्बरको गाडी तोडफोड गरेर पञ्चदेवल बिनायक नगरपालिकामा तालाबन्दी गरेका छन् । भिडलाई नियन्त्रणमा लिन प्रहरीले ८ राउण्ड हवाई फायर र ४ राउण्ड अश्रुग्यास प्रहार गरेको थियो ।
बल बहादुर शाहीको छोरा १७ वर्षीय मृतक बिनोद बहादुर शाहीको मोबाइल शवभन्दा माथि मध्यपहाडी लोकमार्गमा भेटिएको छ । उनले लगाएको चप्पल र भिरमा अड्किएको अवस्थामा भेटिएको छ । जेठ १७ मा राति रिठा टोलबाट हराएका उनको परिवारले प्रहरीलाई जानकारी गराएका छन् । मृतक एमाले निकट परिवारका हुन् । पिडित पक्षले काँग्रेस निकटहरुले हत्या गरेको आरोप लगाएर १८ जनाविरुद्ध ज्यान मुद्दामा किटानी जाहेरी दिएका छन् । तर, प्रहरीले जाहेरी दर्ता गरेको छैन् । विनायक नगरपालिकाका मेयर अम्बिका चलाउने विरुद्धमा पनि किटानी जाहेरी आएको अनुसन्धानमा संलग्न एकजना अधिकृतले बताए ।
