काठमाडौं, ९ असोज । नेकपा माओवादी केन्द्रका अध्यक्ष पुष्पकमल दाहाल प्रचण्डको प्रस्तावमा नेताद्धय नारायणकाजी श्रेष्ठ र जनार्दन शर्मा ‘प्रभाकर’ ले फरक मत अर्थात असहमति जनाएका छन् ।
बिहीबार काठमाडौँको प्रज्ञा भवनमा सुरु भएको माओवादी केन्द्रीय कमिटीको सातौँ बैठकको पहिलो दिन अध्यक्ष प्रचण्डले पार्टी पुनर्गठन र नयाँ नेतृत्वबारे मङ्सिरमा विशेष महाधिवेशन गर्न प्रस्ताव गरेका थिए ।
तर प्रचण्डको प्रस्तावमा नेता श्रेष्ठ र शर्माले असहमति राखेका छन् । वरिष्ठ उपाध्यक्ष श्रेष्ठले प्रचण्डको प्रस्तावअनुसार मङ्सिरमा विशेष महाधिवेशन सम्भव नरहेको भन्दै प्रतिनिधि सभाको निर्वाचनपछि महाधिवेशनमा जानुपर्ने बताए । ‘मङ्सिरमा विशेष महाधिवेशन सम्भव छैन, निर्वाचन पछि महाधिवेशन गर्नुपर्छ,’ श्रेष्ठको भनाइ छ ।
त्यस्तै नेता शर्माले निर्देशक समिति बनाएर नयाँ पुस्तामा नेतृत्व हस्तान्तरण गर्नुपर्ने धारणा राखे । ‘अहिलेका सबै पदाधिकारी राजीनामा दिएर निर्देशक समितिमार्फत नयाँ पुस्तामा नेतृत्व हस्तान्तरण गरौँ’, शर्माको प्रस्ताव उद्धृत गर्दै स्रोतले भन्यो ।
अध्यक्ष प्रचण्डसहित श्रेष्ठ र शर्माले धारणा राखेपछि बैठक शुक्रबार बस्नेगरी पहिलो दिनको बैठक सकिएको छ ।
