काठमाडौं, ५ माघ । भक्तपुर –२ मा यी दुई उस्तै स्वाभावका व्यक्तिको रोचक भिडन्त हुने भएको छ । नेकपा (एमाले) ले सो क्षेत्रबाट महेश बस्नेतलाई उम्मेदवार बनाउने भएको छ भने रास्वपाले राजिव खत्रीलाई बस्नेतसंग भिडाएको छ । दुवै मुखाले स्वभावका मानिन्छन् ।
जेन–जी आन्दोलनपछि बस्नेतले काठमाडौं महानगरका मेयर बालेन्द्र साहविरुद्ध जेहाद छेड्दै आएका छन् । त्यसैले साहले ‘जसरी पनि बस्नेतलाई हराउने’ उद्देश्यसहित खत्रीलाई अघि सार्न चाहेको बुझिएको छ । खत्री पूर्वसञ्चारकर्मी हुन् ।
सामाजिक सञ्जालमा बस्नेत र खत्रीको पनि वाकयुद्ध चल्ने गरेको थियो । खत्रीले बस्नेतविरुद्ध तीखा टिप्पणी गरिरहँदा बस्नेतले पनि खत्रीको नामै लिएर उस्तै जवाफ दिने गरेका छन् । उनीहरूको आपसी कटुताले गर्दा चुनावी भिडन्त पनि रोचक हुने भएको छ ।
भक्तपुर २ बस्नेतको निर्वाचन क्षेत्र हो भने खत्री काठमाडौं १० बासिन्दा हुन् । गत आमनिर्वाचनमा बस्नेत पराजित भएका थिए । खत्री भने भर्खरै राजनीतिमा होमिएर पहिलोपटक चुनाव लड्दैछन् ।
