हातमा पेस्तोल लिएर किम जोङ उन र छेउमा उनकी छोरी

प्योङयाङ, २९ फागुन । उत्तर कोरियाली राष्ट्रपति किम जोङ उनको नयाँ तस्बिर सार्वजनिक भएको छ। त्यसमा उनी आफ्नी छोरीसँगै पेस्तोल चलाइरहेको देखिन्छ। उनको हातमा पेस्तोल देखिन्छ।

उत्तर कोरियाको आधिकारिक समाचार एजेन्सी, कोरियन सेन्ट्रल न्यूज एजेन्सीले उत्तर कोरियाली नेताले हतियारहरू ‘धेरै राम्रो’ भनेर वर्णन गरेको बताएको छ। यद्यपि राज्य मिडिया रिपोर्टले किम जोङ उनकी छोरीलाई कारखानामा साथै लगेको उल्लेख गरेको छैन, तर तस्बिरहरूमा उनले अन्य वरिष्ठ उत्तर कोरियाली अधिकारीहरूसँग पेस्तोल चलाएको देखाइएको छ।

किम जोङ उनकी छोरी किम जु ए, केवल १३ वर्षकी छिन् । तर उनी अहिले प्रायः आफ्ना बुबासँग कार्यक्रमहरूमा देखिन्छिन्। किम जु ए आफ्नो बुबाको उत्तराधिकारी हुने निश्चित भएको विश्वास गरिन्छ। यी तस्बिरहरू हल्का हतियार कारखानाको निरीक्षणको क्रममा खिचिएका थिए। वर्षौंसम्म आणविक हतियारमा ध्यान केन्द्रित गरेपछि, किम जोङ उन अब परम्परागत सेनालाई आधुनिकीकरण गर्ने दिशामा काम गरिरहेको बताइएको छ ।

छोरीले किम जोङ उनसँग पेस्तोल चलाएको देखियो
किम जु–ए पहिलो पटक नोभेम्बर २०२२ मा सार्वजनिक रूपमा देखिएकी थिइन्। त्यसबेलादेखि, उनी आफ्ना बुबासँगै कारखाना उद्घाटन र सैन्य प्रदर्शनी लगायत धेरै सार्वजनिक कार्यक्रमहरूमा गएकी छिन् । गत सेप्टेम्बरमा, उनी आफ्ना बुबासँगै बेइजिङ गइन्, जहाँ उत्तर कोरियाली नेताले छ वर्षमा चिनियाँ राष्ट्रपति सी जिनपिङसँग पहिलो शिखर सम्मेलन गरेका थिए ।

पिस्तोल कारखानाको भ्रमणको क्रममा, बुबा–छोरीको जोडीले परीक्षण प्रक्षेपण देखेको बताइएको छ, जसलाई राज्य मिडियाले ूनौसेना विनाशकबाट आणविक(सक्षम क्रूज मिसाइलू भनेर वर्णन गरेको छ।

गत महिना, एक राज्य मिडिया रिपोर्टले उनलाई स्नाइपर राइफलको परीक्षण गरिरहेको देखाएको थियो। यो घटना उनका बुबाले वरिष्ठ अधिकारीहरूलाई हतियार प्रदर्शन गरिरहेको बेला भएको थियो। किम जु ए किम जोङ उन र उनकी श्रीमती री सोल जुका एक मात्र सार्वजनिक रूपमा चिनिने सन्तान हुन्। दक्षिण कोरियाको राष्ट्रिय गुप्तचर सेवाले उनको जेठो छोरा भएको विश्वास गरे पनि, जोङ उनले यो कुरा कहिल्यै स्वीकार गरेका छैनन्। उत्तर कोरियाको राज्य मिडियाले पनि उनको छोराको बारेमा कुनै उल्लेख गर्दैनन् ।