उपप्रधानमन्त्री ईश्वर पोखरेल भन्छन् – मेरो नियोजित ढंगले चरित्र हत्याको प्रयास गरियो

राजनीति

Ishwor Pokhrel

काठमाडौं । उपप्रधानमन्त्री तथा रक्षामन्त्री ईश्वर पोखरेलले आफ्नो नियोजित ढंगले चरित्रहत्याको प्रयास भएको बताएका छन् । डा. उपेन्द्र कोइराला राष्ट्रिय वाणिज्य बैंकको अध्यक्षमा सिफरिस भएपछि सामाजिक सञ्जालमा पोखरेल ट्रोलमा परेका छन् ।

आफ्नो सम्धिलाई पटक–पटक राजनीतिक नियुक्तिमा पारेको भन्दै उनको व्यापक विरोध भएको छ । सामाजिक सञ्जालमा खप्नै नसक्ने गरी विरोधको ओइरो लागेपछि उनले सामाजिक सञ्जालबाटै यसको प्रतिवाद गरेका छन् । उनले फेसबुकमा पोष्ट गरेको स्टाटस यस्तो छ : _

सबै महानुभावहरूमा अनुरोध !
——————————-
केही दिनयता मलाई केन्द्रीत गरी कतिपय संचार माध्यमहरूले समाचार सम्प्रेषण गरेका छन् । ती समाचारहरू प्रति मेरो गंभीर ध्यानाकर्षण भएको छ ।
मेरो परिवारका कुनै सदस्य वा मेरा कुनै नाता सम्बन्धमा रहेका व्यक्तिहरूद्वारा पद वा मसितको सम्बन्धको दुरूपयोग गरी विद्यमान क़ानूनी व्यवस्थालाई उल्लंघन गरेर लाभ लिएकाे वा पद प्राप्त गरेको भन्ने विषयमा कुनै सत्यता छैन । भएका काम विधिसम्मत, पारदर्शितासहित र संस्थागत निर्णय प्रक्रियाका आधारमा मात्रै भएका छन् । कहींकतै पनि मेराे अबाञ्छित चासो वा हस्तक्षेप नभएको कुरा जानकारी गराउँदछु । यदि अन्यथा भएको पाइएमा वा प्रमाणित भएमा सार्वजनिक रूपमा सजायको भागिदार हुने समेत विश्वास दिलाउन चाहन्छु ।

मेरो यो दृढता र विश्वासलाई लाञ्छित गर्ने हिसाबले तथ्यहीन र अत्यन्त गलत मनसायका साथ सार्वजनिक भएका/ गरिएका कुराहरू प्रति खेद व्यक्त गर्दछु । यस्ताे विषयका कारण दु:खित हुनुभएका मप्रति सद्भाव राख्ने, मलाई माया गर्ने, समर्थन गर्नुहुने आदरणीय मित्रहरूलाई कुनै पनि किसिमको भ्रममा नपर्न अनुरोध गर्दछु ।

विगतमा राजाले सम्पूर्ण शासन सत्ता आफ्नो हातमा लिएको र त्यसविरूद्ध संघर्ष गरेका कारण यातनापूर्ण बन्दी जीवन विताइरहेका बेला सम्पूर्ण रूपमा बदनाम र चरित्रहत्या गर्ने हिसावले “घरको पानी ट्यांकीमा पैसा राखेको“ कुप्रचार गरिएको थियो ।

अहिले विगतको निरंकुश शाही शासनका तिनै दुष्ट मतियारहरू समेत नयाँ ढंगले मेराे बिरूद्धमा स्वर उरालिरहेका छन् ! म ती सबैलाई चुनौती दिदै घृणापूर्वक अस्वीकार गर्दछु । सम्पूर्ण शुभचिन्तक, समर्थक, मित्रहरू तथा आम जनतालाई विश्वास दिलाउन चाहन्छु – तपाईंहरूको विश्वास र भरोसालाई म कहिल्यै / कहिल्यै कमजोर हुन दिने छैन – किमार्थ टुट्न दिने छैन !!
– ईश्वर पोखरेल
१० भदाै २०७७

प्रतिक्रिया दिनुहोस्
विशेष समाचार