बार्साको जीतमा मेस्सीको नयाँ कीर्तिमान

खेलकूद

115010597 gettyimages 1229189052 uZSAme8ZQq

एजेन्सी । कप्तान लियोनेल मेस्सी कीर्तिमानी १६ औँ च्याम्पियन्स लिग सिजनमा गोल गरेपछि बार्सिलोनाले फेरेंकभारोसलाई पराजित गर्दै च्याम्पियन्स लिगको नयाँ सिजनमा विजयी सुरुवात गरेको छ । मंगलबार राति भएको खेलमा बार्सा ५–१ को विशाल अन्तरले विजयी भएको हो ।

मेस्सीले खेलमा २७ औँ मिनेटमा पेनाल्टीमार्फत गोल गर्दै बार्सालाई अग्रता दिलाएका थिए । योसँगै मेस्सीले सबैभन्दा धेरै फरक–फरक च्याम्पियन्स लिगको सिजनमा गोल गर्ने म्यान्चेस्टर युनाइटेडका पूर्वविंगर रायन गिग्सको कीर्तिमान बराबरी गरेका छन् । पहिलो हाफ सकिन लाग्दा अन्सु फातीले बार्साको अग्रता दोब्बर बनाए ।

दोस्रो हाफमा फिलिपे काउटिन्होले बार्साको तेस्रो गोल थपे । तर, खेलको ६८ औँ मिनेटमा जेरार्ड पिके रातो कार्ड खाँदै बाहिरिए भने इहोर खाकातिनले पेनाल्टीमार्फत गोल गर्दै बार्साको अग्रता कम गर्ने प्रयास गरे । लगत्तै, १७ वर्षीय पेड्री र ओसमान डेम्बेलेले गोल थप्दै बार्साको सहज जीत सुनिश्चित गरे ।

समूहकै अर्को खेलमा युभेन्टसले डाइनामो किएभलाई २–० गोलअन्तरले पराजित गर्यो । युभेन्टसको जीतमा दुवै गोल अल्भारो मोराटाले गरे ।

कोरोनाभाइरसको संक्रमण पुष्टि भएपछि क्रिस्टियानो रोनाल्डो भने टोलीमा थिएनन् ।

प्रतिक्रिया दिनुहोस्
विशेष समाचार