एपस्टिन दस्तावेजले खोलेको पोल : रुसी युवतीसंगको विल गेटस्को यौन धन्दा र ट्रम्पमाथि इजराइली पहुँच

एजेन्सी, १७ माघ । जेफ्री एपस्टिनसँग सम्बन्धित मुद्दामा अमेरिकी न्याय विभागले ठूलो संख्यामा नयाँ दस्तावेजहरू सार्वजनिक गरेको छ । पछिल्लोपटक दस्तावेजमा दुई हजारभन्दा बढी भिडियो र एक लाख ८० हजार तस्बिरहरू समावेश छन् ।

यी दस्तावेजहरू राष्ट्रपति डोनाल्ड ट्रम्पद्वारा हस्ताक्षरित कानुनले तोकेको समयसीमा समाप्त भएको छ हप्तापछि सार्वजनिक भएको हो ।

यौन दूराचारी जेफ्री एपस्टिनसँग सम्बन्धित फाइलहरूबाट भएका नयाँ खुलासाहरूले अमेरिकी राजनीति र कर्पोरेट संसारमा हलचल मच्चाइरहेको छ ।

हालै सार्वजनिक गरिएका नयाँ कागजातहरूमा अमेरिकाका राष्ट्रपति डोनाल्ड ट्रम्प र माइक्रोसफ्टका सह–संस्थापक बिल गेट्सबारे गम्भीर दाबीहरू गरिएको उल्लेख छ ।

प्राप्त ताजा रिपोर्टहरूका अनुसार, एपस्टिन फाइल्समा रहेको एक एफबीआई रिपोर्टलाई उद्धृत गर्दै डोनाल्ड ट्रम्प इजरायलद्वारा प्रभावित वा चापमा पारिएको दाबी गरिएको छ ।

ती फाइलहरूका अनुसार, एपस्टिनले ट्रम्पका ज्वाइँ जेरेड कुशनरमार्फत इस्रायली गोप्य निकायहरूको ट्रम्पसम्म प्रत्यक्ष पहुँच रहेको बताएका थिए ।

सो रिपोर्टमा एपस्टिनकोमा ट्रम्पसँग सम्बन्धित केही संवेदनशील सूचनाहरू रहेको र ती सूचनालाई राजनीतिक प्रभाव सिर्जना गर्न प्रयोग गर्न सकिने संकेत गरिएको छ ।

तर, ट्रम्पको टोलीले भने यी सबै दाबीलाई सधैंझैँ आधारहीन र राजनीतिक रूपमा प्रेरित प्रचार मात्र भएको प्रतिक्रिया दिएको छ ।

बिल गेट्समाथि आरोप
अर्कोतर्फ, ती कागजातहरूमा संसारका सबैभन्दा धनी व्यक्तिहरूमध्ये एक बिल गेट्सबारे पनि अत्यन्त निजी र विवादास्पद दाबीहरू प्रस्तुत गरिएको छ । फाइलहरूका अनुसार, जेफ्री एपस्टिनले बिल गेट्सले रुसी युवतीहरूसँग यौन सम्बन्ध राखेको र त्यसपछि उनलाई यौन रोग लागेको दाबी गरेका छन् ।

एपस्टिनका अनुसार, गेट्सले एन्टिबायोटिक औषधि मागेका थिए, ताकि ती औषधि उनले तत्कालीन पत्नी मेलिन्डा गेट्सलाई लुकी–लुकी दिन सकुन् । एक इमेलमा एपस्टिनले आफूलाई गेट्सका सल्लाहकार बोरिस निकोलिकको रूपमा परिचय दिँदै उनले गेट्सलाई रुसी युवतीहरूसँगको यौन सम्बन्धका परिणामसँग जुध्न औषधि उपलब्ध गराए र अन्य नैतिक रूपमा अनुचित कामहरूमा पनि सहयोग गरेको लेखेका छन् ।

एपस्टिनले गेट्ससँगको सम्बन्ध अन्त्य भएकोमा असन्तुष्टि प्रकट गरेको दाबी पनि ती फाइलहरूमा उल्लेख गरिएको छ । रिपोर्टहरूका अनुसार, एपस्टिन यी सूचनाहरू प्रयोग गरेर बिल गेट्सलाई धम्क्याउन वा ब्ल्याकमेल गर्न चाहन्थे, ताकि गेट्सले उनको च्यारिटी फन्डमा लगानी गर्न सहमति जनाउन् ।

यी आरोपबारे प्रतिक्रिया दिँदै बिल गेट्सका प्रवक्ताले ती सबै दाबी पूर्ण रूपमा झुटो भएको बताएका छन् । गेट्सले यसअघि नै एपस्टिनसँग भेट गर्नु आफूसँग भएको ठूलो गल्ती भएको स्वीकार गरिसकेका छन् ।

तर, उनले कुनै पनि किसिमको अवैध गतिविधिमा संलग्न भएको वा एपस्टिनसँग घनिष्ठ सम्बन्ध राखेको आरोपलाई सधैं अस्वीकार गर्दै आएका छन् ।

जेफ्री एपस्टिनसँग सम्बन्धित फाइलहरू क्रमशः सार्वजनिक भइरहेकाले अमेरिकाका अनेकौं प्रभावशाली व्यक्ति अनुसन्धानको घेरामा पर्दै गएका छन् । यद्यपि, यी फाइलहरूमा गरिएका धेरै दाबीहरूको सत्यता अहिलेसम्म कानुनी परीक्षण र औपचारिक अनुसन्धानकै विषय रहेको छ, तर विश्वव्यापी रूपमा यसले नयाँ विवाद र बहसलाई थप चर्काएको छ ।

यी कागजातहरू ‘एपस्टिन फाइल्स ट्रान्सपेरेन्सी एक्ट’ अन्तर्गत सार्वजनिक गरिएका हुन्, जसले सम्बन्धित सबै कागजात सार्वजनिक गर्नुपर्ने व्यवस्था गर्छ ।

तथापि, फाइलहरूमा धेरै स्थानमा रेड्याक्ट (नाम वा सूचना ढाकिएका) गरिएको छ र दावीहरूको ठूलो हिस्सा अझै अपुष्ट नै छन् । एपस्टिनले सन् २०१९ मा जेलभित्र आत्महत्या गरेका थिए, तर उनको विरुद्धको अनुसन्धानका क्रममा निरन्तर उच्च–स्तरीय व्यक्तिहरूको नाम सार्वजनिक हुँदै आएका छन् ।